დემოკრატიის მიმოხილვა: ფიცო „სლოვაკური მაიდანის“ საფრთხესა და გადატრიალების მცდელობაზე საუბრობს

სხვაგან რეგიონში, ორბანი ბუდაპეშტის ნახევარ უბანს არაბ ინვესტორებზე ყიდის; ჩეხეთში უკრაინისადმი მხარდაჭერა იკლებს; პოლონეთი ცდილობს აშშ-დან მაღალტექნოლოგიური ჩიპების შეძენაზე შეზღუდვები გაუქმდეს

 

სლოვაკეთში საპარლამენტო დებატები, რომელიც რობეტ ფიცოს მთავრობისათვის უნდობლობის ვოტუმის გამოცხადების საკითხს ეხებოდა, უეცრად დასრულდა. ეს მას შემდეგ მოხდა, რაც პრემიერის თხოვნით, პარლამენტის დროებითმა თავმჯდომარემ, პიტერ ჟიგამ, სხდომა დახურულად გამოაცხადა. ოპოზიციამ უარი თქვა დახურულ სესიაში მონაწილეობაზე, რომლის დროსაც ფიცომ სლოვაკეთის დაზვერვის სააგენტოს (SIS) „მტკიცებულებებზე დაფუძნებული“ ანგარიში წარადგინა, სადაც მინიშნებებია შესაძლო გადატრიალებაზე. დაზვერვის ანგარიში პარლამენტის დღის წერიგში არ ყოფილა, რამაც გააძლიერა ბრალდებები, რომ ფიცო დაზვერვას პოლიტიკური ქულების დასაწერად იყენებს. დაზვერვის სააგენტოს პავოლ გასპარი ხელმძღვანელობს, ტიბორ გასპარის შვილი, რომელიც პოლიციის ყოფილი უფროსი და ფიცოს „სმერის“ პარტიის მოქმედი დეპუტატია. თავად გასპარი ორგანიზებული კრიმინალური ჯგუფის წევრობაშია ბრალდებული. ოპოზიციის ლიდერებს თუ დავუჯერებთ ფიცოს მტკიცებები იმეორებს მისსავე საჯარო რიტორიკას, მათ შორის ე.წ. „სლოვაკური მაიდანის“ შესახებ, რაც უკრაინაში იანუკოვიჩის კორუმპირებული რეჟიმის წინააღმდეგ მომხდარ პროევროპულ რევოლუციას მიემართება. ფიცო ვარაუდობს, რომ ადამიანები, რომლებიც საქართველოსა და უკრაინის პროტესტებში იყვნენ ჩართულები ახლა სლოვაკეთში გარედან წამოსული დახმარებისა და არასამთავრობო ორგანიზაციების გავლით მოქმედებენ. ის ამტკიცებს, რომ ამ ორგანიზაციებს აქვთ გზების ბლოკირებისა და სამთავრობო შენობების ოკუპაციის გეგმები და ოპოზიციასთან არიან დაკავშირებულები. არასამთავრობოებმა ბრალდებები უარყვეს და განაცხადეს, რომ მათი აქტივობები კანონიერია. უსაფრთხოების საბჭოს სხდომაზე, რომელსაც პრეზიდენტი პიტერ პელეგრი და სამთავრობო გუნდის წევრები ესწრებოდნენ, პრევენციული ზომები განიხილეს, რის შემდეგაც ფიცომ ოპოზიციას „გადატრიალების ორგანიზება“ დასდო ბრალად. ფიცომ ყველა დაარწმუნა, რომ შეიარაღებულ ძალებს პროტესტის მონაწილეების წინააღმდეგ იქამდე არ გამოიყენებს, სანამ ძალადობა არ დაიწყება – სცენარი, რომლის განვითარებასაც, სავარაუდოდ, ელოდება. ფიცო ამტკიცებს, რომ ხელისუფლების ცვლილება მხოლოდ არჩევნების გზით უნდა მოხდეს, რომლისაც ოპოზიციას ეშინია, რადგან, მისი თქმით, ისევ დამარცხდება. თუმცა მისი კოალიცია უკვე თვეებია შიდა  კონფლიქტებს ებრძვის და მხოლოდ მინიმალური უმრავლესობა აქვს. ბოლო პერიოდში ფიცომ აღიარა, რომ შესაძლოა ვადამდელი არჩევნების დანიშვნა მოუწიოს, იმის მიუხედავად, რომ ბოლო გამოკითხვების მიხედვით  მისი კოალიცია მთავრობის დაკომპლექტებას ვეღარ შეძლებს და ოპოზიციის გამარჯვება უფრო მოსალოდნელია.   ამასთან, კრიტიკოსები ფიცოს ადანაშაულებენ  დაზვერვის სამსახურის ბოროტად გამოყენებაში – ტაქტიკაში, რომელიც, მათი თქმით, პოლიტიკური ოპონენტების წინააღმდეგ შურისძიებას ემსახურება. ოპოზიციაში ყოფნისას ფიცო ამტკიცებდა, რომ პოლიტიკური  „დევნის“ ობიექტი იყო.   იმ პერიოდში ბევრი მისი მოკავშირე ან გასამართლდა, ან გასამართლების საფრთხის წინაშე აღმოჩნდა, მისი მთავრობის მიერ განხორციელებულმა სისხლის სამართლის კოდექსის რეფორმებმა მათ ნაწილს პასუხისმგებლობისგან თავის აირდების შესაძლებლობა მისცა.

 

მენტალური ჯანმრთელობის 600-ზე მეტმა პროფესიონალმა ღია წერილით მიმართა ფიცოს, სადაც გამოხატავენ შეშფოთებას მისი მმართველობის პერიოდში პოლიტიკური კულტურისა და დემოკრატიული ღირებულებების საგანგაშო ეროზიის გამო.  წერილში, რომლის პირველი ხელმომწერებიც ცნობილი ექსპერტები პროფესორი ჯოზეფ ჰასტო და პროფესორი ანტონ ჰერეტიკი იყვნენ, განსაკუთრებული ყურადღება ექცევა შიშებს ქვეყნის საშინაო სტაბილურობისა და საერთაშორისო არენაზე პოზიციონირების შესახებ. ხელმომწერები ფიცოს ურჩევენ შეცვალოს მიდგომები, ან წავიდეს პოლიტიკიდან, განგაშის ზარს სცემენ დემოკრატიის წინაშე არსებული მზარდი საფრთხის გამოც. ისინი ამტკიცებენ, რომ ფიცოს საჯარო ქცევა აგრესიული და ავტორიტარულია, ეს განსაკუთრებით უკანასკნელი პოლიტიკური გაურკვევლობის შუქზე გამოჩნდა. „თქვენი პოლიტიკური ქცევა გამოირჩევა ძალაუფლების მოხვეჭის სურვილითა და ავტორიტარული სტილით, ფაქტების მანიპულირებით, ტყუილებით, მოწინააღმდეგეების გაშავებით და თავდასხმებით პოლიტიკურ ოპონენტებზე, ჟურნალისტებზე, და უბრალო მოქალაქეებზე, რომლებიც უკმაყოფილებას გმაოთქვამენ“, – აღნიშნულია წერილში. წერილი ეხმიანება 1998 წლის მსგავს მოწოდებას, რომელიც ექსპერტებმა ფიცოს წინამორბედ, ყოფილი პრემიერს  ვლადიმირ მეციარს გაუგზავნეს. ფიცომ წერილი „სანაგვის ნონსენსად“ მოიხსენია და მის ავტორებს საკუთარი პროფესიების პოლიტიკური მიზნებისთვის ბოროტად გამოყენებაში დასდო ბრალი. მან ხაზი გაუსვა, რომ ცვლილებები მთავრობაში დემოკრატიული არჩევნების გზით უნდა მოხდეს, და არა „ფსევდო-სამედიცინო პამფლეტებით“. ფიცომ ასევე პირობა დადო, რომ ამ საკითხს საერთაშორისო ორგანიზაციებს გააცნობს, რადგან ექპსერტებმა პროფესიონალური საზღვრები დაარღვიეს.

 

ორბანი ბუდაპეშტის ნახევარ უბანს არაბ ინვესტორებზე ყიდის; პროპაგანდისტი ულტრამემარჯვენე ქსელს ქმნის

 

უნგრეთის მთავრობის განცხადებამ, რომ ბუდაპეშტის ნახევარი უბანი საამიროებში დაფუძნებულ “Eagle Hills Group-ს” 50 მილიარდ ფორინტად (120 მილიონ ევროდ) მიჰყიდეს საზოგადოების შოკი გამოიწვია. ჯგუფის მფლობელი, მოჰამედ ალაბარი, რომელმაც „ბელგრადის სანაპიროს“ პროექტში ფულის დაბანდებით გაითქვა სახელი, ახალი უბნის აშენებას გეგმავს, რომელსაც დიდი ბუდაპეშტი უნდა ეწოდოს და რომლის ღირებულება 2039 წლისთვის 5 მილიარდ ევროს მიაღწევს. მანამდე მინი (ან მაქსი) დუბაიდ წოდებულმა პროექტმა კრიტიკოსებს უბიძგა ეკითხათ, თუ რამდენად შეესაბამება ბუდაპეშტის ამხელა ტერიტორიის გაყიდვა უნგრეთის მთავრობის სუვერენიტეტზე დაფუძნებულ რიტორიკას. „ეს ჩვეულებრივი ღალატია“, დაწერა ფეისბუქზე ბუდაპეშტის მწვანე მერმა გერგელი კარაჩონიმ. „ბუდაპეშტის უბნის ნახევარი ახლა უცხო ქვეყნის კონტროლისა და ზედამხედველობის ქვეშაა – ნამეტანია ნაქები სუვერენიტეტისათვის“, კარაჩონის მისი კონსერვატორი მოწინააღმდეგე დავიდ ვიტეზიც დაეთანხმა. ბუდაპეშტის მუნიციპალიტეტი ამტკიცებს, რომ გაყიდული მიწის ნაწილის ყიდვა შეეძლო და ახლა კონტრაქტის გასაჩივრების სამართლებრივ გზებს ეძებს. მშენებლობის მინისტრმა იანოს ლაზარმა გამანადგურებლად უპასუხა კრიტიკოსებს: „არაფერი ჩეკის გარდა: მოიტანეთ 5 მილიარდი (ფორინტი) და შეგიძლიათ წაიღოთ მიწა, რომელზეც უკანასკნელი 30 წლის განმავლობაში არაფერი გაგიკეთებიათ“. ტერიტორია, სადაც „დიდი ბუდაპეშტის“ აშენებაა დაგეგმილი დანგრეული რკინიგზის სადგურის ირგვლივ მდებარეობს და ქალაქის ერთ-ერთ ყველაზე ჩამორჩენილ ნაწილად ითვლება. მიუხედავად კონსენსუსი, რომ ტერიტორია უნდა განახლდეს,  აზრთა სხვადასხვაობაა იმაზე, თუ რა უნდა აშენდეს და საიდან უნდა მოვიდეს ფინანსური რესურსი. ბუდაპეშტის მუნიციპალიტეტი პირობას დებს, რომ აქ „მწვანე სივრცეები და რეკრეაციული ინფრასტრუქტურა“ აშენდება, ხოლო ინვესტორი 400-500 მეტრი სიმაღლის ცათამბჯენების აშენებას გეგმავს, რაც რადიკალურად შეცვლის ბუდაპეშტის სახასიათო ხედს. Valaszonline.hu-მ ფარდა ახადა მთავრობასთან დაახლოებული ბიზნესმენების სიას, რომლებიც ამ პროექტში არიან ჩართულები. ევროკავშირიდან დაფინანსების არ არსებობისა და ეკონომიკური სტაგნაციის პირობებში, უნგრეთის კონსორციუმის კომპანიებს „დიდი ბუდაპეშტის“ პროექტი სამაშველო ჟილეტად მიაჩნიათ. თუმცა, უძრავი ქონების ექსპერტები მოსახლეობას აფრთხილებენ, რომ პროექტი უძრავ ქონებას გააძვირებს და დაამძიმებს არსებულ საბინაო კრიზისს ახალგაზრდა ოჯახებისათვის.

 

კრიტიკულმა გაზეთმა hvg.hu-მ გამოაქვეყნა გამოძიება პრემიერის პროპაგანდისტი არპად ჰაბონის შესახებ და მის ჩართულობაზე წინასაარჩევნო კამპანიებში საქართველოში, სლოვაკეთში, პლონეთში და ამერიკის შეერთებულ შტატებში. განსაკუთრებით მრავლისმეტყველია, როგორ უღალატა ვიქტორ ორბანის მთავრობამ ყოფილ მოკავშირე მიხეილ სააკაშვილს და „ქართული ოცნებასა“ და მის ლიდერ ბიძინა ივანიშვილს შეეკრა. ჰაბონს უნგრეთის მთავრობაში ოფიციალური პოზიცია არ უკავია, თუმცა ცოტა ხნის წინ არჩეული, ამერიკის მიერ სანქცირებული პრემიერის კაბინეტის ახლო მოკავშირედ ითვლება. მინისტრი ანტალ როგანი გასული წლის განმავლობაში რამდენიმეჯერ იყო საქართველოში და იქ მმართველ პარტიას კამპანიების დაგეგმვაში ეხმარებოდა. უნგრეთის მთავრობა თბილისის გვერდით იდგა, მაშინ როდესაც მათ რუსული სტილის კანონმდებლობა მიიღეს, რომელიც გარედან დაფინანსებულ არასამთავრობო ორგანიზაციებს ასანქცირებდა, ამან ქვეყნის ევროკავშირში მიღების პროცესი შეაჩერა. ორბანმა მაშინვე მიულოცა ივანიშვილს არჩევნებში გამარჯვება და ბრიუსელს წარბები აუწია. თუმცა, უნგრელი პროპაგანდისტები ნაკლებად წარმატებულები იყვნენ პოლონეთში, სადაც დამარცხებულმა „PIS“ პარტიამ 2023 წელს მხარდამჭერთა დაკარგვა უნგრელ მრჩეველებს დააბრალა. უკანასკნელ პერიოდში, ჰაბონი და მისი ჯგუფი ბუენოს აირესში ნახეს, სადაც მათ არგენტინის პრეზიდენტ ხავიერ მილეის გაუზიარეს სტრატეგია იმის შესახებ თუ როგორ უნდა დარჩეს მთავრობაში ოთხი ვადის განმავლობაში, როგორ გამოიყენოს ნეგატიური პროპაგანდა და დეზინფორმაცია ამომრჩეველთა მხარდაჭერის მოსაპოვებლად. გაზეთმა შენიშნა, რომ ჰაბონი და მისი კოლეგები შეკრებებისათვის მთელ მსოფლიოში უნგრეთის საელჩოს სივრცეებს იყენებენ, საელჩოები რადიკალი მემარჯვეენეების შეკრების ადგილად გადაიქცა.

 

ჩეხეთის მოსახლეობის მხარდაჭერა უკრაინისადმი შემცირდა; კითხვები ახალგაზრდებს შორის ძალადობას ეხება

 

ჩეხების ინტერესი და მხარდაჭერა უკრაინის მიმართ შემცირებას განაგრძობს. ბოლო გამოკითხვის მიხედვით, რომელიც საზოგადოებრივი აზრის კვლევის ცენტრმა ჩაატარა, უკრაინაში მიმდინარე ომით ახლა მოსახლეობის ნახევარზე ნაკლები (43 პროცენტი) არის დაინტერესებული. ეს 14 პროცენტიანი ვარდნაა 2024 წლის დასაწყისთან შედარებით, ხოლო 2022 წელთან შედარებით მონაცემი თითქმის განახევრებულია. ამასთანავე, რესპონდენტების 58 პოცენტი არ ეთანხმება ჩეხეთის მთავრობის კიევისადმი მხარდაჭერას, მაშინ როდესაც არსებულ პოლიტიკას მხოლოდ მესამედი უჭერს მხარს. ეს რიცხვები პირდაპირი მნიშვნელობით განსხვავდება იმ მონაცემებისგან, რასაც რუსული აგრესიის პირველ პერიოდში ვხედავდით. ჩანს, რომ მოსახლეობამ კარგად იცის ომის შესახებ, თუმცა ძალიან ცოტას სჯერა, რომ კიევს ბრძოლის ველზე გამარჯვება შეუძლია. დიდია უკმაყოფილება ყველაფრით, რაც არაპოპულარულ პრემიერ პეტრ ფიალასთან არის დაკავშირებული. კვლევა ასევე აჩვენებს, რომ მოსახლეობის უმრავლესობას კვლავ მიაჩნია, რომ უკრაინაში მიმდინარე კონფლიქტს შეუძლია მნიშვნელოვანი საფრთხე შეუქმნას ევროპისა და ჩეხეთის უსაფრთხოებას. 40 პროცენტზე მეტი მხარს უჭერს რუსეთის იზოლაციას, ასევე  ფინანსური და სამხედრო დახმარების გაგრძელებას უკრაინისთვის. მეტიც, CVVM-ის გამოკითხვა აჩვენებს, რომ მოსახლეობის მეათედი მხარს დაუჭერდა ჯარისკაცების გაგზავნას საბრძოლო მოქმედებებში მონაწილეობის მისაღებად. ეს შედეგები შეუსაბამობაშია შედარებით ძლიერ პრორუსულ განწყობასთან ქვეყნის რეგიონებში. კიდევ ერთი კვლევის მიხედვით, რომელიც შარშან STEM-მა ჩაატარა, საზოგადოების უმრავლესობა ამჯობინებდა უკრაინას გაემარჯვა, რაც რუსების მიერ დაკავებული ყველა ტერიტორიის დაბრუნებას გამოიწვეევდა, თუმცა ეს სცენარი ნაკლებად სავარაუდოდ მიიჩნევა.

 

ჩეხეთი ახალგაზრდებს შორის მზარდი ძალადობის ტენდენციას შეეჯახა? ეს კითხვა განხილვის საგნად ბოჰემიის დაწყებით სკოლაში მომხდარი ინციდენტის შუქზე იქცა. 13 წლის მოსწავლე მასწავლებელსა და დანარჩენ მოსაწვალეებს იარაღით დაემუქრა. სასხლეტის ორჯერ გამოკვრის მიუხედავად, არცერთი ტყვია არ გავარდა, მასწავლებელმა მოსწავლის მშვიდობიანად ნეიტრალიზება მოახერხა, რომელსაც დანა და ნაჯახიც ჰქონდა.  მოსწავლე არასრულწლოვანთა პატიმრობის ცენტრში მოათავსეს. დიდი ტრაგედიის თავიდან არიდება მოხერხდა, თუმცა ინციდენტმა პროფესიონალები აიძულა განგაშის ზარები შემოეკრათ. მაიკლ გოტცის მიხედვით, რომელიც ბავშვთა ფსიქიატრიული ჰოსპიტალის ხელმძღვანელია ოპარანიში, ჩეხეთი განიცდის მკვეთრ მატებას ბავშვთა ძალადობისა და აგრესიის შემთხვევებში, მისი თქმით პრობლემა კიდევ უფრო გაიზრდება. უკანასკნელი წლის მონაცემების მიხედვით, 2021 წლის შემდეგ არასრულწლოვანთა მიერ ჩადენილი დანაშაულები გაორმაგდა. გაიზარდა ზრდასრულთა შორის კრიმინალის მაჩვენებელიც, თუმცა შედარებით ნაკლებად.  ექსპერტების თქმით, ბავშვები განსაკუთრებით მიდრეკილი არიან ძალადობრივი ქცევისაკენ, თუ სახლში სირთულეებს აწყდებიან – ისინი ხშირად იმეორებენ იმ ძალადობასა და ტრავმას, რომელიც სახლში გამოუცდიათ. უფრო მეტიც ახალგაზრდები ერთმანეთისგან იღებენ „ინსპირაციას“, როდესაც ძალადობის სხვა შემთხვევების შესახებ იგებენ. მხოლოდ ბოლო კვირაში, მეზობელ სლოვაკეთში, 18 წლის მოზარდმა ორი ადამიანი მოკლა საშუალო სკოლაზე თავდასხმისას. ისე დაემთხვა, რომ ჩეხეთის პარლამენტის ქვედა პალატამ ბავშვთა ომბუდსმენის ახალი პოზიცია დაამტკიცა და მიიღო მთავრობის ახალი შემოთავაზება ბავშვებისა და ოჯახური ძალადობის სხვა მსხვერპლების დასაცავად.

 

პოლონეთი მეტი მაღალტექნოლოგიური ჩიპის მიღებას ლობირებს ამერიკიდან; პოლიტიკოსები მსჯელობენ უკრაინისათვის „800+“-ის ლიმიტირებაზე

 

პოლონეთის მთავრობამ იმ შეზღდუვების მოხსნისათვის ბრძოლა დაიწყო, რომლებიც ა.შ.შ.-მ მაღალტექნოლოგიური ჩიპებისა და ხელოვნური ინტელექტის განვითარებისთვის საჭირო სხვა ტექნოლოგიებზე დააწესა. იანვრის შუაში ა.შ.შ.-მ დააანონსა, რომ მსოფლიოს მასშტაბით 18 ქვეყანას (რომლებშიც პოლონეთი არ არის) არ ექნება შეზღუდვები ამერიკული კომპანიებისგან ამ პროდუქტების შესყიდვაზე; მეორე ჯგუფს, რომელსაც პოლონეთი განეკუთვნება შესყიდვის ლიმიტები დაუწესდება; სხვებს კი, მაგალითად ჩინეთს, ჩიპების შესყიდვა სრულად შეეზღუდებათ. ვაშინგტონის თქმით მიზანია „დარწმუნებული ვიყოთ რომ ხელოვნური ინტელექტის გლობალური მოხმარება ამერიკულ ტექნოლოგიებს ეყრდნობა და მოწინააღმდეგებს მარტივად არ შეეძლებათ ბოროტად გამოიყენონ განვითარებული ხელოვნური ინტელექტი“. ანგარიშების მიხედვით, პოლონეთის მთავრობა შოკირებული იყო, როდესაც აღმოაჩინა, რომ ქვეყანა მაღალტექნოლოგიური ჩიპების მიმღებთა მეორე ჯგუფში მოხვდა. „პოლონეთის გამოტოვება 18 საკვანძო მოკავშირისა და პარტნიორის სიიდან ის გადაწყვეტილებაა, რომელსაც ვერ მივიღებთ,“ – განაცხადა კრზისტოფ პაშიკმა, პოლონეთის ეკონომიკური განვითარებისა და ტექნოლოგიების მინისტრმა, რომელსაც პოლიტიკო ციტირებს. სხვა განცხადებაში მინისტრმა აღნიშნა: „პოლონეთი წლების განმავლობაში ინვესტიციებს დებდა მაღალი ტექნოლოგიების სექტორის განვითარებში, შესაძლო შეზღუდვები უარყოფითად იმოქმედებს პროცესის სიჩქარესა და მასშტაბზე“. ვარშავა ამტკიცებს, რომ ეს შეზღუდვები ნეგატიურ გავლენას მოახდენს ქვეყნის სამხედრო შესაძლებლობების გაძლიერების ძალისხმევაზე, განსაკუთრებით იმ ფონზე,  როცა ხელოვნური ინტელექტრი სულ უფრო აქტიურად გამოიყენება ბრძოლის ველზე მოწინააღმდეგის სამიზნეების აღმოსაჩენად და თავდასხმისთვისაც კი. პაშიკის მიხედვით, ვარშავა ამერიკელ პარტნიორებთან ერთად კატეგორიზაციის ცვლილების შესახებ მოლაპარაკებებს აწარმოებს. გარდა ამისა, ვარშავამ ევროკომისიასაც მიმართა თხოვნით, რომ საკითხში ჩაერიოს.

 

ოპოზიციურმა “PIS” პარტიამ წარმოადგინა კანონპროექტი, რომელიც უკრაინულ ოჯახებს ე.წ. “800+” სუბსიდიაზე წვდომას შეუზღუდავს, დაწესდება პირობა, რომლის მიხედვითაც ბავშვის მშობლები უნდა მუშაობდნენ და პოლონეთში გადასახადებს იხდიდნენ. ინიციატივა მას შემდეგ გაჩნდა, რაც მმართველი კოალიციის საპრეზიდენტო კანდიდატმა, რაფალ ტრჩასკოვსკიმ პოლონეთში მცხოვრები, დასაქმებული და გადასახადების გადაამხდელი ოჯახებისათვის ბავშვთა დახმარების შეწყვეტის იდეა წამოაყენა. ბენეფიტები, როგორიცაა “800+”, უნდა მიდიოდეს მათთან, ვისაც ჩვენს ეკონომიკაში შემოაქვს წვლილი, ეს სამართლიანი და საღ აზრზე დაფუძნებული მიდგომაა“-თქვა ტრჩასკოვსკიმ ამომრჩევლებთან შეხვედრაზე. „PIS” აცხადებს, რომ მათი კანონპროექტი იმის შემოწმებას ემსახურებოდა თუ რამდენად სერიოზულები იყვნენ ტრჩასკოვსკი და მმართველი პარტია ამ საკითხზე საუბრისას. ბავშვთა სუბსიდია პირველად “PIS”-მა წარადგინა, ამბობენ, რომ ინიციატივამ პარტიას მთავრობაში ადგილი რვა წლის განმავლობაში შეუნარჩუნა. პრემიერი დონალდ ტუსკის პარტია, თავდაპირველად აკრიტიკებდა ამ ზომებს, თუმცა 2023 წელს მთავრობაში მოსვლის შემდეგ კანონმდებლობა შეინარჩუნა, მისი პოპულარობისა და ბავშვთა სიღარიბის შემცირების ეფექტის გამო.